Mi nombre es Erik

Soy un niño con un carácter fuerte pero también soy muy cariñoso y buen amigo

Erik naiz

Izaera sendoa baina txeratsua eta adiskidetsua duen mutikoa naiz

Niri buruz

Erik dut izena. Izaera oso sendoa duen mutikoa naiz. Baldarrarena egitea eta txantxak egitea asko gustatzen zait, eta etxerako lanak egitea ez zait batere gustatzen.

Nire lagunekin asko erlazionatzen naiz, gehien bat neskekin. Haiekin patioan jolastea eta haien etxera lo egitera joatea, edo haiek nirera etortzea asko gustatzen zait. Asko maite ditut.

Panpinekin jolastea gogoko dut, baina jolasten ari naizenean kalean jendea begira geratzeak gogaitu egiten nau. Batzuetan esaten didate ez naizela mutil bat, nire patinak arrosak direlako. Nesken komuna mutilena baino gustukoagoa dut, garbiago baitago

Eriken gurasoak

Garbiñe eta Gorka

Erik mutiko alaia eta txeratsua da. Bihotz handia dauka, baina burugogorra eta alferra da. Beti izan da horrela.

Denetariko jolasetan aritzen da: futbolean, panpinekin eta haien orgatxoarekin jolasean, irristailuekin edo bizikletan ibiltzen da… Bai mutilekin bai neskekin, baina batez ere neskekin jolasten da, feeling gehiago baitu haiekin. Mugikorrarekin eta tablet-arekin ibiltzea ere asko gustatzen zaio. Azazkalak margotzea gustatzen zaio eta aurpegia margotzen ere aritzen da. Harry Potteren eta playmobil jostailuen zale amorratua da. Familiarekin kanpalekura joatea izugarri gustatzen zaio. Kanpalekura iritsi bezain pronto, haurra jada joan zaigu!

Bere arrebari txantxak egiten dizkio, baina asko maite du. Erik maitatzea erraza da, eta nahiz eta bere akatsak izan, berak ere akats bai baititu, sentsibilitate zoragarria eta bizitza honetan behar duen, eta oso ondo etorriko zaion izaera ditu.

Bizi dugun prozesu honetan Erik ia ez da aldatu. Aldatu dena Erikez genuen ikuspegia da. Hark ile-mozketa, izena, barruko arropa, eta den modukoa izan ahal izatea baino ez ditu aldatu.

Guretzat ikastaldi handia da. Ia dena nahikoa erraza izan da, nahiz eta gizarteari oraindik asko falta zaion jendea desberdina dela onartzeko.

Erik maite duen jendeak den moduan onartzen du. Besteak ezaugarri desberdinak izanik ere onartzen dituzten moduan: altuago edo potoloago izan, betaurrekoak izan, eta abar. Garrantzitsuena pertsona da, bihotza da. Jendea errespetatzea eta onartzea. Maitasunarekin munduko leku guztietara irits gaitezkeelako.